Әйгілі "Қара майор" Борис Керімбаев қайтыс болды


«Қара майор» есімімен белгілі Ауған соғысының ардагері, отставкадағы полковник Борис Керімбаев 71 жасында дүниеден озды.


Ақпаратты Алматы әкімшілігінің жанындағы Ауғанстандағы соғыс ардагерлері және мүгедектері бірлестіктерінің үйлестіруші кеңес төрағасы Мұрат Әбдішүкіров растады.


«Иә, ауыр сырқаттан бүгін таңертең қайтыс болды. Қашан, қалай жерленетіні туралы бүгін жиналыста талқылайтын боламыз»,- деді М.Әбдішүкіров.


Борис Төкенұлы Керімбаев 1948 жылы 12 қаңтарда Алматы облысының Жамбыл ауданында дүниеге келген. 1970 жылы В. И. Ленин атындағы Ташкент әскери училищесін тәмамдаған.


1980-1983 жылдары Ауған соғысына қатысып, арнайы тапсырмаларды орындайтын мұсылман батальонының командирі болды. Сауатты басшылықтың арқасында батыр командирдің сарбаздары аз шығынға ұшырап, көбінесе жеңіске жетіп отырған. Пандшер шатқалында моджахедтердің атақты қолбасшысы Ахмад Шах Масудтың әскерімен соғысқан.


Ол туралы «Қара майор» фильмі түсірілген.