Алматы көшелерінің біріне Мұстай Кәрімнің есімі берілді


Кеше Алматы көшелерінің біріне Мұстай Кәрімнің есімі берілді, деп хабарлайды Қазақстанның Ресейдегі елшілігі.


9 шілде күні өткен салтанатты шараға ҚР Ресей Федерациясындағы төтенше және өкілетті елшісі Иманғали Тасмағамбетов, Алматы қаласының әкімі Бақытжан Сағынтаев, Мәдениет және спорт министрі Ақтоты Райымқұлова және башқұрт делегациясын бастаған Мұстай Кәрім атындағы қордың құрылтайшысы, ақынның немересі Тимербулат Кәрім қатысты.



Сонымен қатар, «Мамыр-1» шағынауданында орналасқан көшенің ашылу салтанатына қала тұрғындары, қазақстандық және ресейлік ақын-жазушылар, этномәдени бірлестіктер, жастар ұйымдары және Мұстай Кәрімнің туыстары жиналды.


«Бүкіл түрік дүниесінің ұлы шайыры, бауырлас башқұрт халқының ақыны, жазушы-драматург Мұстай Сәфиұлы Кәрімнің есімі қаламыздағы ең бір көрнекті көшеге беріліп отыр. Төрткүл дүниеге есімі кеңінен танымал Мұстай Кәрімді біздің қазақ оқырманы өз ақыным, төл перзентім деп біледі. Ақынның «Үш таған», «Талтүс» атты кітаптары қазақ тіліне аударылған. Еліміздің қалың оқырманы Мұстай Кәрімді төл ақынындай құрметтеп, оның жалынды жырларын жатқа оқиды, - деп сөз бастады Алматы әкімі



"Сұм соғысты да бастан кешкен Мұстай Кәрім қолынан ақ қағаз бен қаламды бір тастаған емес. Ол ауыр жарақат алып, госпитальдан сауығып шыққан соң, майданның алғы шебіне оралып, өз шығармалары арқылы жауынгерлерге рух беріп отырды. Біз үшін Мұстай Кәрім осындай ізгі де қастерлі қасиеттерімен есте қалады. Оның ұмытылмас тылсым туындыларын жыр сүйер қауым ғасырлар бойы жадында қалатыны сөзсіз", - деді Мәдениет министрі.


Айта кетелік, Ресейдің Станиславский атындағы Мемлекеттік сыйлығының, Башқұртстан Мемлекеттік сыйлығының, КСРО Мемлекеттік сыйлығының лауреаты, Социалистік Еңбек Ері Мұстай Кәрімнің биыл 100-жылдығы кеңінен тойлануда.