Алматыда триатлоннан іріктеу чемпионаты өтеді



2019 жылдың 15 қыркүйегінде "Алматы Арена" кешенінде 7 жастан 23 жасқа дейінгі спортшылар арасында триатлоннан "Алматы ашық чемпионаты" өтеді.


"Бапкерлер үшін осындай жарыстар - үлкен "селекциялық" жұмыстың бір бөлігі. Біз осындай жарыстарда кіші топтардағы спортшыларға ерекше көңіл бөлеміз. Өйткені, мықты спортшыны тәрбиелеу үшін, баламен ерте жастан бастап жұмыс жасауымыз керек. Сонда ғана жақсы нәтиже шығады", - дейді жарыстың бас төрешісі Максим Мазур. 


Айта кетейік, Almaty Triathlon Federation екі жыл ішінде бірнеше талантты спортшыларды тәрбиелеп шығарды. Мысалға айта кететін болсақ, Ғазиза Құмақбаева мен Дарья Бычкова биылғы жылы ҚР Ұлттық құрамасының спортшылары сапында өнер көрсетеді.


Ғазиза – негізгі құрамада, ал Дарья - жастар арасында. 15 жасар спортшы Александр Тен 2019 жылдың басынан бері қатарынан үш бірдей жоғары титулды жеңіп алды. Ол Қазақстан, Орталық Азия және бүкіл Азия құрлығының чемпионы атанды. Басқа атлеттер де жақсы нәтижелер көрсетіп, Азия құрлығындағы ең мықты деген триатлеттер қатарына кіруге тырысу үстінде.


Чемпионаттың басты міндеттері - Almaty Triathlon Federation құрамасын толықтыру үшін спортқа деген қабілеті жоғары балаларды анықтау және триатлонды насихаттау.


"Алматы құрамасы үнемі жаңартылып отырады. Біздің елдің мақтанышы болар атлеттер, болашақ чемпиондар, өсіп келеді. Алайда, өкінішке орай, уақыты келгенде бізді тастап кетеді. Сондықтан, үнемі жаңа спортшыларды тәрбиелеуімізге тура келеді. Сондықтан да, құрметті ата-аналар, өз балаларыңызды триатлонға әкеліңіздер. Сіздің балаңыздың бүгінгі жеңісі - бұл тек қала құрамасына ғана емес, сондай-ақ бұл ұлттық командаға, болашақ олимпиадаларға жол. Әрине, барлық қатысушылар бірден құрамаға жолдама алмайды, жаттықтырушылар ең мықты балаларды таңдайды. Бірақ басқа балаларға қапа болудың еш қажеті жоқ. Алда әлі де мүмкіндік барын естен шығармау керек",- деп айтып өтті Almaty Triathlon Federation қамқоршылар кеңесінің мүшесі Валихан Тен.


Алдағы Чемпионатқа келетін болсақ, ол екі кезеңде өтеді. "Акватлон" дистанциясында (жүзу 50 м, жүгіру 1 км) 7-9 жастағы спортшылар қатысады. Тағы бір акватлондық қашықтық (100 м жүзу, 2 км жүгіру) 10-12 жастағы балалар үшін өтеді. Және де, 13-23 жас аралығындағы атлеттер "Триатлон-суперспринт" (300 м жүзу, 8 км вело, 2 км жүгіру) дистанциясында өнер көрсетеді.


Триатлон - бұл үш кезеңді қамтитын, яғни, жүзу, веложарыс және жүгіруден тұратын мультиспорттық жарыс.