Ұшақта электронды темекі шеккен әйел рейстен түсірілді


Көлік полицейлері ұшақ бортында электронды темекі шеккен әйелді әуе рейсінен түсіріп алды, деп хабарлады көлік полиция департаментінің баспасөз қызметі.


Жыл басынан еліміздің көлік полицейлері әкімшілік құқық бұзушылықтар үшін 43 277 азаматты әкімшілік жауапкершілікке тартты, оның ішінде қоғамдық орында темекі тартқаны үшін – 2 981 адам жазаланды.


«Мәселен, 11 қазан күні Қарағанды қаласы әуежайындағы Желілік полиция бөлімшесіне «FlyArystan» АҚ әуе компаниясының өкілінен «Алматы - Қарағанды» бағытындағы әуе кемесінің бортында құқық бұзушылық болғаны туралы хабарлама келіп түсті. Тексеру барысында көлік полицейлері әуе кемесі бортында электронды темекі шеккен 26 жастағы Алматы қаласының тұрғынын анықтады. Азаматша әуе кемесі командирінің актісі бойынша рейстен түсірілді», - делінген хабарламада.


Аталған факті бойынша ҚР ӘҚБтК 441-бабының 1-2 тармағы бойынша әкімшілік хаттама толтырылып, оған 50 АЕК көлемінде айыппұл салынды.