Әрбір медициналық сақтандыруы бар азамат 83,1 мың теңге жұмсай алады


2020 жылы әрбір медициналық сақтандырылуы бар азаматқа көрсетілетін медициналық көмек 83,1 мың теңгені құрайтын болады. Нәтижесінде азаматтардың денсаулыққа жұмсайтын жеке шығындары едәуір қысқарады. Бұл туралы медициналық сақтандыру қоры басқарма төрағасының орынбасары Ерік Байжүнісов хабарлады.


Оның айтуынша, тегін медициналық көмекке бөлінетін қаражат көлемі жыл сайын артып отырғанына қарамастан, медицина саласындағы шығындардың 41%-ы халықтың қалтасынан шығады. Бұл ДДСҰ (Дүниежүзілік Денсаулық сақтау Ұйымы) белгілеген межеден екі есе көп.


Медициналық сақтандыру қорының мәліметінше, қазір халықтың 93%-ы сақтандыру жүйесімен қамтылған. Оның 58%-ы – мемлекет тарапынан сақтандырылатын жеңілдігі бар 11 млн азамат көрінеді. Қалғаны – жалдамалы жұмысшылар, жеке кәсіпкерлер мен БЖТ төлеушілер екен.


Сақтандырылған азаматтардың бәрі де 2020 жылдан бастап кеңейтілген көлемде медициналық көмек ала алады. Олардың қатарында салалық мамандар кеңесі, бағасы қымбат зертханалық анализдер мен МРТ, КТ сынды диагностикалық зерттеулер де бар.


«Тұрғындарға аз мөлшерде жарна төлеп, ауырып қалған жағдайда құны миллиондаған теңге тұратын көмекке қол жеткізуге болатынын айтып түсіндіруіміз керек. Мысалы, жүрек немесе бауыр алмастыру сынды күрделі операциялар қолжетімді болмақ. Әлеуметтік сақтандыру дегеніміз міне, осы», – деді Е.Байжүнісов.


Жұртшылықты жұмыстан шығып қалған жағдайда медициналық көмек көрсету тәртібі өзгере ме деген сауалдың мазалайтыны анық.


«Жұмыссыз қалған азаматтар МӘМС пакетіне енген қызметтерді жарна төлеу тоқтағаннан кейін үш ай бойы пайдалана алады. Басқа жұмысқа тұрғаннан кейін жұмыс беруші оның атына аударым жасай бастайды. Ал «екі қолға бір күрек» таппаған жағдайда тиісті орындарға хабарласып, жұмыссыз ретінде ресми тіркелу қажет. Бұл санат мемлекет тарапынан сақтандырылады», – деді қор басшысының орынбасары.


Естеріңізге сала кетсек, азаматтар медициналық көмекке қатысты сауалдарын 1406 нөміріне жолдай алады.