Оңтүстік Корея қазақстандықтардың келуіне шектеу қоя ма


Оңтүстік Корея тарапынан Қазақстан азаматтарының елге келуіне шектеу қоятындығы туралы ресми хабар келген жоқ, деп айтты ҚР Сыртқы істер министрлігінің ресми өкілі Айбек Смадияров.


«Өздеріңіздей біз де бұқаралық ақпарат құралдарынан «Корея тарапы Қазақстан азаматтарының елге келуіне шектеу қояды» деген ақпаратты көрдік. Осыған орай мұндай ақпараттың бізге ресми келмегендігін хабарлаймыз. Ресми хабар келіп түссе, онда біз оны жариялаймыз», - деді Айбек Смадияров.


Оның дерегінше, 2019 жылдың 1 қыркүйегіндегі корей тарапының берген деректеріне сәйкес, қазіргі уақытта Оңтүстік Кореяның аумағында 10 785 Қазақстан азаматы жүр.


«Форум басталар алдында біздің министріміз кореялық әріптесімен екіжақты кездесу өткізді. Оның барысында кореялық тараппен екі елдің арасындағы көші-қон саясаты мәселелерін қарастырды. Бірақ, мән-жайын сіздерге жария ете алмаймын», - деді ресми өкіл.