Даурен Абаев: Елбасы президенттің жұмысына араласпайды


ҚР Ақпарат және даму министрі Дәурен Абаев Қазақстандағы «қос билік» қауесеті жөнінде пікір білдірді.


«Хабар» арнасындағы «Ашық диалог» бағдарламасында министр осы мәселе арқылы халықты дүрліктіргісі келетіндер бар екенін айтты.


«Біріншіден, Елбасы Президент жұмысына араласпайды. Мұның барлығы конституциялық нормалармен межеленген. Екіншіден, Тоқаев – екінші Назарбаев емес, оның өз басқару стилі, өз көзқарасы бар. Сондықтан, жаңа президент өз жұмысында жаңа формат қолданған сайын «қос билік» туралы шу көтерудің қажеті жоқ. Үшіншіден, Елбасының өзі де, Қасым-Жомарт Кемелұлы да маңызды мәселе жөнінде кеңесіп отыратындарын айтты. Не дегенмен, Нұрсұлтан Әбішұлының табысты ел басқарудағы тәжірибесі мол. Оған өзге мемлекеттердің де көшбасшылары кеңес сұрап жүгінеді, мұны мен анық білемін», - деді Д.Абаев.


Естеріңізде болса, өз сұқбатында Нұрсұлтан Назарбаев Қазақстанда «қос билік» туралы қауесетке негіз жоқ екенін мәлімдеген болатын.


«Мұндай тұжырымға еш негіз жоқ, себебі Қазақстан президенттік басқару формасы бар унитарлы мемлекет. Мен жол көрсетемін, өздері кеңеседі, кеңес беремін, сұрамаса – кеңес бермеймін (күлді). Өз Отаныма, өз еліме қызмет етуді жалғастырып келемін», - деп жауап берді Нұрсұлтан Назарбаев журналист сұрағына.