Қаржы министрлігі Kaspi Gold арқылы жасалған аударымдарды бақылауға алмақ


Үкімет отырысында қаржы вице-министрі Руслан Еңсебаев "Kaspi Gold төлем жүйесі қаншалықты заңды және министрлік бюджетке көп салық аударымдары түспейді деп санамай ма" деген сұраққа жауап берді.


Вице-министр Kaspi Gold төлемдері жай ғана танымал механизм емес, сонымен қатар өте маңызды жүйе екенін мойындайтынын айтты. Өйткені мобильді қосымша арқылы ақша аударымдарының жүруі арқасында қазақстандықтардың көбі қолма-қол ақшасыз төлем жүйесіне көшуде.


Алайда, оның айтуынша, ведомство бастапқыда "Kaspi аударымдарына" тыйым салуды жоспарлаған, өйткені операциялар "Салық кодексіне" сәйкес келмеген.


"Төлем жүйелері туралы заң тұрғысынан ол талаптарға сәйкес келеді, бірақ Салық кодексі мен фискализация тұрғысынан сәйкес келмейді. Біз бұл механизмге тыйым салуды ойластырдық, бірақ тұтастай алғанда бұл біздің экономикаға оң әсер етпеуі мүмкін. Бұл мәселені біз Ұлттық банк және Kaspi Bank-пен талқылап жатырмыз.",- дейді ол.


Вице-министрдің айтуынша, Қазақстан қолма-қол ақшасыз төлемдерді дамыту деңгейі бойынша ең дамыған елдердің бірі, сондықтан ведомство трендті сақтау үшін Kaspi Gold жүйесі арқылы төлем жасау мүмкіндігіне тыйым салмауды шешкен.


"Бұл өте маңызды. Қолма-қол ақшасыз төлемдердің 10% - ға өсуі ЖІӨ-нің 1% - ға өсуіне мүмкіндік береді. Біз бұл динамиканы сақтап қалғымыз келеді. Бірақ оны дұрыс, заманға сай жасауымыз керек",- дейді Еңсебаев.


Спикердің айтуынша, қосымша арқылы ақша аудару – шағын кәсіп иелері үшін өз табысын салық органдарынан жасырудың оңтайлы жолы.


Вице-министр қазіргі кезде Kaspi Bank мұндай аударымдарды бақылау тетіктерін әзірлеп жатқанын айтып өтті. Уақыт өте келе, олар онлайн-кассалық-бақылау құрылғы ретінде пайдаланылып, Мемлекеттік кірістер комитетінің талаптарына сай болады.