Алматыда санитарлық нормалардың сақтамаған 91 нысанға айыппұл салынды


Бүгін әкімдік, полиция департаменті, СЭС және «Атамекен» кәсіпкерлер палатасының өкілдерінен тұратын арнайы жұмыс тобы сұлулық салондары, ірі азық-түлік сататын базарлар, супермаркеттер мен техника дүкендерін тексерді. Нәтижесінде Алматыда ашылған нысандарда санитарлық нормалардың бірқатар бұзушылықтары анықталды.


Мәселен, орталық әмбебап дүкенде сатушылар қолғапсыз жұмыс істеген, кіреберіске санитайзер мен тепловизор орнатылмаған. Сөрелерде қапталмаған нан өнімдері болған.


«Дәл осындай көріністі «Көк базардан» да байқауға болады. Мұнда да санитарлық талаптар сақталмаған. «Барлығын тездетіп ретке келтірулеріңізді сұраймын. Мұнда бір жақты қозғалыс болуы керек. Адамдар топталып жиналып қалмауы тиіс. Әлеуметтік қашықтықты сақтаңыздар. Дезинфекциялық туннельдер орнатылуы керек. Тепловизорларыңыз істен шыққан. Резервте басқасы болуы шарт. Мен мұны өрескел бұзушылық деп санаймын», - деді қаланың бас мемлекеттік санитарлық дәрігері Жандарбек Бекшин.


Сонымен қатар, комиссия мүшелері келушілер ғимаратқа кірген кезде антисептиктерді қолдануы керектігін айтты. Ал күзет осының бәрін қадағалап, ескертіп отыруы қажет. Ал сұлулық салондарындағы қызметкерлер санитарлық талаптармен толық таныс болмай шықты.


«Қызметкерлер маскаларды қаншалықты жиі ауыстыру керектігін білмейді, әр 20 минут сайын дейді. Іс жүзінде әр 2-3 сағат сайын ауыстыру керек. Олар сондай-ақ ауыз бен мұрынды толығымен жабуы қажет. Шеберлер арасындағы қашықтық 1,5-2 метр болуы тиіс», - деп түсіндірді қаланың бас санитар дәрігері сұлулық салонының әкімшісіне.


Бекшиннің айтуынша, анықталған кемшіліктер бойынша хаттамалар толтырылады.


«Анықталған бұзушылықтар, ескертулер мен кемшіліктер негізінде аудандық бас санитар дәрігері хаттама толтырады. Сонымен қатар, біз көрсеткен кемшіліктерді жою тапсырылды. Айыппұлдың мөлшері төрт миллион теңгеге жетеді. Түрлі жеңілдіктер бар, егер айыппұл бір апта ішінде төленсе, онда оның мөлшері 50% дейін қысқарады. Мұның бәрі бизнестің қай категорияға жататынына байланысты»,– деді Бекшин.


Бүгінгі таңда 3000-нан астам нысан тексерсе, 91 объекті бойынша өрескел заң бұзушылықтар анықталып, әкімшілік айыппұлдар салынған. 

Holanews.kz